KOTA KINABALU (Jan 21, 2009): Naib Polosiden Parti Keadilan Rakyat (PKR) Datuk Dr Jeffrey Kitingan mokianu kopolintaan Hongkod mooi sumikap monoodo mahik kalaja kopolijistahan layat Sabah id lahan tagaagazo montok mongintong do mogiigizon kinoizonon no i onuan do MyKad toi ko ningkokoton koponompogunan.

Minoboos isido haang tabaa dino kiguno saasabap o do kivaa tanda tatahang i pinopokito "kivaa nuununu di au nokotunud" miampai kalaja kopolijsitahan montok koonuan kopotutan koponompogunan id lahan pointunud tumanud undang-undang pogun diti.

Baino diti Dr Jeffrey pinapahabus iso kiis id Kota Belud i pinopokito do songuhun mogiigizon kinoizonon isido nopo nga Rafli Dalam nokoimagon do kiningkokoton "napatai" do Koupisan Kopolijistahan Pogun (JPN) ontok 2001 sundung tu isido kakal poimpasi.

Ka disido ahal dino apatut do au antakan om otumbazaan ino kivaa kogompitan miampai kiis projik IC i huguanon do modiidikot aiso kasagaan.

"Toiso’ iso’ layat Sabah mogimbiungot kokomoi kobohingkangan mantad po toi kiningkokoton kiponompogunan toi k kad kointutunan MyKad. Timpu diti kivaa vagu tuhun kakal poimpasi nga kiningkokoton do napatai.

"Onu i poinsusuvai nopo nga tuhun i kiningkokoton napatau diti (Rafli) pinasaga do mongundi ontok pomihian tagazo 2004. Otumbazaan zou kiis diti nopo nga vookon toniini mantad i tootopot dino nantakan, om mositi intangan tavavagat," ka disido kuminaa Bernama kahapas minonoodo luputan pulis kokomoi ahal dino id Balai Pulsi Karamunsing, somok doiti di koniab.

Minangatag i Dr Jeffrey mooi kopolintaan Sabah onuan kopotutan perlembagaan montok papatantu ningkokoton koponompogunan mogiigizon id pogun diti om okon nodii potontuon do JPN hongkod id Kuala Lumpur.

Suvai mantad dino, mokianu isido JPN om kopolijsitahan momihi baakason mantad no ogumu kiis kaampai no i pinotoguvang id kuut kogompit miampai IC toi ko kosingonuan MyKad id lahan kotongob id pogun diti.

"Au tokou mimang kiis miaga i notoguvang di Rafli antakan vagu. Kopolintaan Hongkod mositi otuhid om mongkimamaa montok monguhan kobohingkangan i au opupusan diti montok mintamong kopotutan mogiigizon kinoizonon id Sabah," ka disido.

Dr Jeffrey nga mongunsub kopolintaan monuidong Suruhanjaya Diraja montok monoizuk id lahan saviavi kobohingkangan projik IC id Sabah.

Naamot dino, Rafli, 38, i minonoodo nogi luputan pulis id doiti, minoboos Isido babaino nokotoguvang mogisusuvai kobohingkangan mantad no kointutunan i okomi do napatai no.

"Pidondian pomuhominan hamin tomuula hoogo miampai Kotinanan Pomuhominan om Poguhudan kakadazan id Tuaran, lisin pongindopuan nokotood no om nasansagan humapas kalaja komponi pongindopuan saasabap no do kointutunan napatau om koozuzuvo diti kobohingkang kozo paganakan ku," ka disido.

Tumanud di Rafli, JPN id Hulu Langat, Selangor pinapahabus do sijil kinapatazon disido i kinumbul pongintangan C619367 di ontok 27 Vuhan Koopod 2001.

Ka disido nokoiho isido ningkokoton dino songian minokitoina miampai do JPN Sabah montok koonuan sijil kinosusuvon tanak disido ontok di ko 30 Vuhan Kaapat 2007.

"Pogudizaan dino isai i nadadi huguan manaak kopoihaan kumaa JPN hongkod do napatai zou no?

"Tumanud rekod JPN i pinokitanan kumaa dogo, nokoimagon zou do napatai di 2001 nga kakal pasagaon mongundi id Kampung Sembirai (Usukan), Kota Belud ontok pomihian tagazo di 2004 nga ontok pomihian nakatahib ngaan ku aiso nodii id suang kopolijistahan mongundi," ka disido.

Minoboos i Rafli nokopokinsian no isido impiipio kumaa JPN Sabah montok popotunud koozuzuvo nga aiso haang i naanu gisom baino diti "gisom nasansagan zou do minonoodo luputan pulis baino diti," ka disido.